Интерактивті атқарымдары

Қоғамдық маңызы бар тергеулер

17 қазан, 2017

Әбілязовтың сыбайластары болып саналатын БТА Банкінің №6 Корпоративтік бизнес басқармасының бұрынғы заңгері Максим Хаблов пен Әбілязовтың бақылауындағы компаниялардың шартты жетекшісі Анар Әбдіхаимова 2017 жылы 16 қазанда Ресей Федерациясының Мәскеу қаласынан Қазақстанға өз еріктерімен келді.

Оларға Мұхтар Әбілязовтың ұйымдасқан қылмыстық тобына БТА Банкінің ақшалай қаражатын жымқыруға жәрдемдесті деген айып тағылып отыр.

Хаблов пен Әбдіхаимова ресейлік азаматтық алған және бұл оларды Қазақстанға экстрадациялауға кедергі келтіретініне қарамастан, олар Сыбайлас жемқорлыққа қарсы іс-қимыл ұлттық бюросына хат жазып, Қазақстанға өз еріктерімен келуге дайын екендіктерін жеткізген.

Сыбайлас жемқорлыққа қарсы қызмет аталған жайт пен іс бойынша жиналған материалдарды ескере отырып, оларға қатысты бұрын тағайындалған бұлтартпау шараларын өзгертті. Осыдан кейін Хаблов пен Әбдіхаимова Қазақстанға келді.

Биылғы шілде және қыркүйек айларында Будапешт қаласынан Әбілязовтің кезінде Проблемалық несиелер басқармасы басшысының орынбасары болған Ержан Қадесов және БТА Банкінің №6 Корпоративтік бизнес басқарма басшысының бұрынғы орынбасары Зәуре Жүнісова Қазақстанға ерікті түрде келген еді.

Олар 2009 жылдан бері іздеуде жүрген және Қазақстанға оралған соң, бұрын тағайындалған «қамауға алу» бұлтартпау шарасы жеңілдетілді.

Қазіргі уақытта жоғарыда көрсетілген фигуранттардың қатысуымен қажетті тергеу амалдары жүріп жатыр.

Олар өз айыптарын толық мойындап, БТА ақшалай қаражаттарын миллиардтап жымқыру, бақылаудағы компанияларға заңсыз несие беру және қымбат активтерді сатып алу арқылы олардың ізін жасыру жөніндегі Әбілязов әрекеттерінің заңға қайшы екенін растады.

Олар Әбілязовтің нұсқауымен компаниялардың шартты жетекшісі болған және қажетті құжаттарға қол қойған.

Сондай-ақ, олар қылмыстық іс қозғалған соң, Банк басшысына қарсы куәлік беруді болдырмау мақсатында Әбілязовтің тапсырмасымен сыбайластары Банк қызметкерлерін және бақылаудағы компаниялардың басшыларын қорқыту және бопсалау жолымен Қазақстаннан шығаруды ұйымдастырған.

Сол себепті Әбілязовтың кезінде БТА банкте жұмыс істеген көптеген қызметкер елден кетуге мәжбүр болған. Жырақта жүргенде де қорқытып-үркітулер жалғасып, олардың Қазақстанға оралуына мүмкіндік бермеген.

Қазіргі уақытта жоғарыда аталған тұлғаларға қатысты сотқа дейінгі тергеу жалғасуда, олар тергеуге белсене көмек көрсетіп, Әбілязовтің қылмыстық тобының заңға қайшы іс-әрекеттері туралы жаңа фактілерді ашты.

13 қазан, 2017

Сыбайлас жемқорлыққа қарсы іс-қимыл ұлттық бюросы Алматы мен Шығыс Қазақстан облысының бұрынғы әкімі В.В. Храпунов, оның зайыбы Л.К.Храпунова, А.К.Ильясовты және тағы басқа адамдарға қатысты қылмыстық істі тергеп жатыр.

Тергеу барысында Сыбайлас жемқорлыққа қарсы қызмет жоғарыда аталған адамдар мен олардың сыбайластарының құқыққа қарсы әрекеттерін растайтын дәлелдерді тапты.

Жиналған материалдар аталған адамдардың әрекеттерін ұйымдасқан қылмыстық топты құру және оған жетекшілік ету, лауазымды қызметті асыра пайдалану, мемлекеттік мүлік пен бюджет қаражатын алаяқтық арқылы жымқыру, пара алу және оны заңдастыру ретінде айқындауға мүмкіндік берді.

ҚР Қылмыстық-процессуалдық кодексінің 208-бабы 1-бөлігіне сәйкес, күдіктілер жауап алуға шақырылады.

Алайда В.В. Храпунов, Л.К.Храпунова, А.К.Ильясовтың Қазақстан Республикасы аумағынан тыс жерде болып, яғни жауап беруден жалтаруларына байланысты Сыбайлас жемқорлыққа қарсы күрес қызметы ҚР ҚПК-нің 205-бабы 3-бөлігі бойынша күдіктілерді Бұқаралық ақпарат құралдары арқылы жауап алуға шақыру туралы ақпаратты жариялайды.

Күдікті ретіндегі В.В. Храпунов, Л.К.Храпунова, А.К.Ильясовты 2017 жылдың 147 қазаны сағат 15:00-ге дейін Қазақстан Республикасы, Астана қаласы, Сейфуллин көшесі 37 мекен-жайындағы Сыбайлас жемқорлыққа қарсы іс-қимыл ұлттық бюросының әкімшілік ғимаратына Тергеу департаментінің жедел-іздестіру тобының жетекшісі Сергей Николаевич Перовке келуі керек.

Тергеу жұмыстарына қатысу үшін күдікті өзімен бірге қорғаушыны алып келуге немесе органға қылмыстық істі жүргізетін (ҚР ҚПК 68-бабы) қорғаушымен қамтамасыз ету туралы өтініш беруге болады.

Егер күдіктінің немесе оның заңды өкілінің шақыруымен қорғаушы келмесе, орган қылмыстық істі жүргізетін қорғаушыны тауып береді (ҚР ҚПК 67-бабы).

Аталған мерзімде келуге бір себеп кедергі болса, сонымен бірге қорғаушының қатысуын қамтамасыз ету туралы сотқа дейінгі өндірісті жүргізетін прокурорға немесе өзге де тұлғаға өтініш жолдау керек жағдайда күдікті немесе оның заңды өкілі органға міндетті түрде ол туралы ескертуі қажет.

ҚР ҚПК 205-бабы 3-бөлігі бойынша Виктор Храпунов пен Лейла Храпунова, сонымен бірге А.К.Ильясовты шақыру туралы мәлімет республикалық бұқаралық ақпарат құралдары мен Швейцариядағы бұқаралық ақпарат құралдарына жарияланады.

12 қазан, 2017

Сыбайлас жемқорлыққа қарсы іс-қимыл ұлттық бюросы Ақмола облысы Атбасар ауданы әкіміне қатысты қылмыстық істі тергеу барысында Атбасар аудандық ІІБ бастығы, полиция подполковнигі Ш.А. Түбековтің қылмыстық қызметінің жолын кесті.

Ағымдағы жылдың маусым және тамыз айларында Ш.А. Түбековтің көші-қон заңнамасын бұзушылық фактілері бойынша әкімшілік жауапкершілікке тартпау үшін «ХПП Лана» ЖШС директоры Е.Р. Шәйкеновтен жүйелі түрде пара алып отырғандығы тергеумен анықталды.

Ағымдағы жылы 11 қазанда кезекті 400 мың теңге сомасындағы параны алғаннан кейін, қылмыс жасау үстінде Ш.А. Түбековтің қылмысы әшкереленіп, Көкшетау қаласындағы ІІБ УҰО-ға қамалды.

Кінәсін толықтай мойындауына байланысты, Е.Р. Шәйкеновке процестік ұстау шаралары қолданылған жоқ.

Сотқа дейінгі тергеу жүргізілуде.

10 қазан, 2017

Сыбайлас жемқорлыққа қарсы іс-қимыл ұлттық бюросының Атырау облысы бойынша департаменті бірнеше рет пара алғаны үшін «Атырау бөлімдік көліктегі қоғамдық денсаулық сақтау басқармасы» РМК басшысы И.В. Шинды әшкереледі.

Күдікті жолаушылар пойызы бригадирлерінен санитарлық-эпидемиологиялық нормаларды бұзғаны үшін әкімшілік жауапқа тартпауға және жалпы болысушылық жасағанына заңсыз ақшалай сыйақы алу бойынша қылмыстық сызба ұйымдастырған.

29 қыркүйек күні соттың санкциясымен И.В. Шин қамауға алынды.

Параның жалпы сомасы 824 000 теңгені құрайды.

Сотқа дейінгі тергеу жүргізілуде.

10 қазан, 2017

Сыбайлас жемқорлыққа қарсы қызмет тегін медициналық көмектің кепілдендірілген мөлшері аясында дәрі-дәрмектерді сатып алуға бөлінген бюджеттік қаражаттың жымқырылуына қатысты «СК-Фармация» ЖШС басқарма төрағасы М.Е.Касаткин мен өзге де адамдардың жөнінде тергеу амалдарын бастады.

Касаткин «КазСибФармацея» ЖШС-ның пайдасы үшін тендердік процедуралар кезінде аталған компаниялардың бәсекелестерінің өтінімдерін заңсыз қайтарып отырған.

Сонымен қатар «КазСибФармацея» ЖШС-нін сатылып алынған дәрі-дәрмектер Денсаулық сақтау министрлігі белгілеген бағадан 15 процентке қымбатқа өткізілген.

Осылайша 2015-2017 жылдары «СК-Фармация» мен «КазСибФармацея» басшылығы 1,8 млрд теңгені жымқырған.

Соттың санкциясымен Касаткин мен «КазСибФармацея» ЖШС-ның басшысы А.О.Ахметов қамауға алынған.

Сотқа дейінгі тергеу жүргізілуде.

10 қазан, 2017

Сыбайлас жемқорлыққа қарсы іс-қимыл ұлттық бюросының Астана қаласы бойынша департаменті ҚР Ауыл шаруашылығы министрлігі Су ресурстары комитеті Экономика, бюджеттік жоспарлау және бухгалтерлік есеп басқармасының басшысы М.К.Мырзатаевтың қылмыстық әрекетінің жолын кесті.

Күдікті жеңімпаз деп тану үшін және келісімшарт бойынша қаржыны тез аудару үшін мемлекеттік сатып алу қатысушыларынан жүйелі негізде пара алып отырған.

М.К.Мырзатаев кезекті рет 4,3 млн теңге параны алып жатқан кезде ұсталды.

Сонымен қатар, ағымғы жылы 9 қазанда М.К.Мырзатаев мердігер ұйымның мүддесін көздей отырып, 1 млн теңге сомасындағы параны ҚР Қаржы министрлігі Ішкі мемлекеттік аудит комитетінің бас сарапшысы Е.Б. Медеубековке тендердің нәтижесін жоққа шығару үшін берген.

Дәл сол күні М.К.Мырзатаев пен Е.Б. Медеубеков ІІД Уақытша ұстау абақтысына қамалды.

Сотқа дейінгі тергеу жүргізілуде.

09 қазан, 2017

Сыбайлас жемқорлыққа қарсы іс-қимыл ұлттық бюросының Оңтүстік Қазақстан облысы бойынша департаменті жүргізуші арқылы 2,1 миллион теңге көлемінде пара алып жатқан облыс әкімдігінің ішкі саясат басқармасының басшысы Төлеген Б.Б.-ны ұстады. Ақша ақпараттық қызметтерді мемлекеттік сатып алулар туралы келісім бойынша төлем үшін бөлім басшысы Шалкеев Н.Р. арқылы алынған. Ағымғы жылдың 6 қазанында Төлеген Б.Б. Шымкент қалалық ІІД Уақытша ұстау абақтысына қамалды. Өз кінәсін толық мойындағандықтан, Шалкеев Н.Р.-ға қатысты процессуалдық ұстау шарасы қолданылмаған. Сотқа дейінгі тергеу жүргізілуде.

26 қыркүйек, 2017

Оңтүстік Қазақстан облысы бойынша Сыбайлас жемқорлыққа қарсы іс-қимыл департаменті Жұмыспен қамтуды үйлестіру және әлеуметтік бағдарламалар Басқармасы басшысының орынбасары С. Полатовтың және аталған ұйымның аудандық бөлімшелерінің басшылары А. Мақатай және М. Қарақұловтың қылмыстық әрекеттерін әшкереледі.

Күдіктілер жүйелі негізде «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған» бағдарламасын іске асыру шеңберінде жұмыссыз азаматтарды кәсіби даярлау және қайта даярлау бойынша мемлекеттік сатып алу шартын жасау үшін заңды тұлғалардан бопсалаушылық жолмен пара алды.

Қылмыстық схема 2016-2017 жылдар аралығында әрекет етті. Пара өлшемі шарттың сомасына байланысты 20%- 30%-ын, ақшалай тұлғаланымы 3-20 млн. теңгені құрады.

А.ж. 15 қыркүйекте 6,4 млн. теңге жалпы сомасында кезекті пара алу кезінде С. Полатов, М. Қарақұлов және А. Мақатай ҚР ҚПК 128-бабы бойынша ұсталып, Шымкент қаласының ІІД Уақытша ұстау абақтысына қамалды.

А.ж. 18 қыркүйекте күдіктілер соттың санкциясымен қамауға алынды.

Сотқа дейінгі тергеу жүргізілуде.

26 қыркүйек, 2017

Сыбайлас жемқорлыққа қарсы іс-қимыл ұлттық бюросының Қарағанды облысы бойынша департаменті «Ақжол ДС» ЖШС өкілдері М. Ыбышев және Б. Жақпаровтан 17 млн теңге көлемінде пара алу кезінде «Қазақавтожол» РМК Қарағанды облыстық филиалының директоры Г.Мұқанов және оның орынбасары Е.Отаров ұсталды.

Ақшалай қаражат «Қызылорда-Қарағанды-Павлодар» автожолын жөндеу бойынша орындалмаған жұмыстардың құжатына қол қою үшін берілген.

15 қыркүйекте М.Ыбышев, Б.Жақпаров, Г.Мұқанов және Е.Отаров ҚР ҚПК 128-бабы бойынша ұсталып, Қарағанды қалалық ІІД уақытша ұстау абақтысына қамалды.

16 қыркүйекте күдіктілердің барлығы соттың санкциясымен қамауға алынған.

Сотқа дейінгі тергеу жүргізілуде.

10 тамыз, 2017

«Әблязовтің сыбайласы өз еркімен Қазақстанға оралды»

«БТА Банк» АҚ директорлар Кенесінің бұрынғы төрағасы М.Қ.Әблязовтің басшылығымен қылмыстық қоғамдастық жасаған Банктің ақша қаражаттарын жымқыру туралы қылмыстық ісі бойынша күдіктілерінің біреуі 2017 жылы 24 шілдеде Будапешт (Венгрия) қаласынан Қазақстанға өз еркімен оралды.

Әблязовтің кезінде Кадесов Ержан Банктің Проблемалық несиелер басқармасы басшысының орынбасары лауазымын иеленген.

2009 жылы Кадесовқа сырттай айыптау тағылып, оған кейіннен халықаралық іздеу жарияланды.

2016 жылы ақпан айында Кадесовтың Будапешт қаласында екендігі анықталып, оны венгр құқық қорғау органдары экстрадициялық қамаққа алды.

Ағымдағы жылы шілде айында Кадесов Венгрияның сот органдары алдында өз еркімен Казақстанға қайта оралатындығы туралы мәлімдеді.

Қазіргі уақытта, Кадесовтың қатысуымен барлық қажетті тергеу амалдары жүргізілді.

Ол өзінің кінәсін толықтай мойындап, Әблязовпен БТА Банкінің ақша қаражаттарын жымқыру және жылыстату жайттары сияқты, сондай-ақ оған қарсы айғақтар берудің алдын алу мақсатында Банктің қызметкерлерін Қазақстаннан шетке шығаруды ұйымдастырғандығы туралы жан-жақты айғақтар берді.

Бұдан басқа, Венгрияда болған кезінде Әблязов және оның сыбайластары Кадесовты әділетсіз сотпен және тергеу органының алдын ала ойластырылған қатынас қағазымен қорқытып, оған Отанына қайтып оралуына кедергі келтірген.

Кадесовтан алынған айғақтар Әблязовтің басқа да бұрыңғы сыбайластарының түсіндірмелерін жай ғана растап қоймай, сонымен қатар оларды Банктің барлық топ-менеджментін Қазақстаннан Бішкек қаласы арқылы Ресейге, Украинаға және басқа мемлекеттерге заңсыз шығару жайттарымен толықтырады.

Олардың барлығы Әблязовтің нұсқауы бойынша өздеріне қатысты азаптаулар және басқа да заңсыз әдістер қолданылатындығы туралы қасақана жаңылыстырылған.

Ағымдағы жылы 9 тамызда тергеу органымен белсенді ынтымақтастық және қосымша дәлелдер табуда көрсетілген көмек ескертіле отырып, күдікті Кадесовтың және оның қорғаушысының өтінішхаттары бойынша бұрын тағайындалған «қамауға алу» бұлттартпау шарасы «кепілге» ауыстырылды.

Оған қатысты сотқа дейінгі тергеп-тексеру жалғасуда.